RSS

1955-ல் கவி.கா.மு.ஷெரீப் எழுதிய கட்டுரை

இதோ அவர் ‘ தமிழ் முழக்கம்’ பத்திரிகையில் 1955-இல் எழுதிய ஒரு கட்டுரை . கட்டுரையில் அவருக்குப் பிடித்த சில கவிதைகளையும் குறிப்பிடுகிறார்!

KM 1

KM2

KM3

KM4

KM5

 

இன்பம் வந்து சேருமா.. (பாடலாக்கம்: கவி.கா.மு.ஷெரீப்)

 

கவி.கா.மு.ஷெரீப் நூற்றாண்டு விழா

 

Tags:

Image

sheriff today

 

 

IMG_115438427180186

 

பண்பட்ட பாடல் வரிகளுக்குச் சொந்தக்காரர்

நூற்றாண்டு விழா

[கவி.கா.மு.ஷெரீப் நூற்றாண்டு விழா மலருக்கு நானெழுதிய கட்டுரை இது- அப்துல் கையூம்]

வாழ்க்கையில் மட்டுமல்ல, வார்த்தைகளிலும் கண்ணியத்தைக் கடைப்பிடித்தவர் கவி கா.மு.ஷெரீப். அவரது நேரான நெறிகளைப் போன்றே,  அவரது சீரான வரிகளும் இருந்தன.

அவரது பேனா மை சிந்திய சொற்கள், ஏனோ தானோவென்று எடக்கு முடக்காக இல்லாமல், தேனாக பாய்ச்சும் தெளிவான சொற்களாகவே வந்து விழுந்தன. கொச்சை வார்த்தைகளோ, இச்சை வார்த்தைகளோ, பச்சை வார்த்தைகளோயின்றி பண்பட்டவையாகவே அவை  இருந்தன.

பாடலொன்று மனதில் நீங்கா இடம் பெறுவதற்கான தகுதி, அது சந்தம் நிறைந்ததாக இருக்க வேண்டுமென்பதோ, வார்த்தை ஜாலங்கள் மிகுந்ததாக இருக்க வேண்டுமென்பதோ, சங்கத் தமிழ் வார்த்தைகள் கலந்திருக்க வேண்டுமென்பதோ கட்டாயமல்ல.

எளிமையான வார்த்தைகளைத் தேடிப்பிடித்து பாமரனும் புரிந்துக்கொள்ளும் வண்ணம் பாடல்களை இயற்றுவதில் வல்லமை படைத்திருந்தார் கவி கா.மு.ஷெரீப்.

திரைப்படத்தில் பாடலெழுத வாய்ப்பு தேடிவந்தபோது “அம்மி கொத்த சிற்பியை அழைக்காதீர்” என்று மறுத்தவர் கவிக்கோ அப்துல் ரகுமான். திரைப்படப் பாடலில் இரட்டை அர்த்த வரிகளும், ஆபாச வார்த்தைகளும் மலிந்து போனபோது, மனம்வருந்தி “இனி சினிமாவுக்கு பாடல் எழுதவே போவதில்லை” என்று திரையுலகைத் தலைமுழுகியவர் கவி.கா.மு.ஷெரீப்.

இவரெதிய எண்ணற்ற பாடல்களை ஆராய்ந்துப் பார்த்தால் எனது கருத்து எவ்வளவு உண்மை என்பது புரியும். எந்தப் பாடலிலும் சரசத்தை சொட்டும் விரசத்தை மருந்துக்கும் காண முடியாது

‘ஒரு பானை சோற்றுக்கு ஒரு சோறு பதம்’ என்பார்கள். கா.மு.ஷெரீப் எழுதிய ஒரே ஒரு பாடலை மட்டும் இப்போது நம் ஆய்வுக்கு எடுத்துக் கொள்வோம்.

அன்னையைப் பற்றி எத்தனையோ பாடலாசிரியர்கள் எழுதி வைத்துப் போயிருக்கிறார்கள். ஆனால் ஆண்டுகள் பல கடந்தும் ஆழமாக நம் மனதில் அடிச்சுவட்டை பதிந்திருப்பது “அன்னையின் ஆணை” திரைப்படத்தில் கா.மு.ஷெரீப் எழுதிய “அன்னையைப்போல் ஒரு தெய்வமில்லை” என்ற பாடல் மட்டுமே.

அந்தப் பாடலில் அப்படி என்னவொரு சிறப்பு என்பதை சொன்னால் புரியாது. அப்பாடலை அனுபவித்துக் கேட்டால் மட்டுமே நம்மால் பரிபூரணமாக உணரமுடியும்.

தாயின் மாண்பினை எடுத்தியம்பும் ஏராளமான பாடல்கள் திரைப்படங்களில்  இடம் பெற்றிருக்கின்றன.

 ‘தளபதி’ படத்தில் “சின்னத்தாயவள் தந்த ராசாவே ” ,

‘அடிமைப்பெண்’ படத்தில் “தாயில்லாமல் நானில்லை”,

அதே படத்தில் ஜெயலலிதா பாடிய

‘அம்மா என்றால் அன்பு, அப்பா என்றால் அறிவு”

‘உழைப்பாளி’  படத்தில் “அம்மா அம்மா எந்தன் ஆருயிரே”

‘தூங்காதே தம்பி தூங்காதே’  படத்தில் “நானாக நானில்லை தாயே ”

‘வியாபாரி’ படத்தில் “ஆசைப்பட்ட எல்லாத்தையும் காசிருந்தா வாங்கலாம் அம்மாவ வாங்க முடியுமா?”

‘மன்னன்’ படத்தில் “அம்மா என்றழைக்காத உயிரில்லையே!  அம்மாவை வணங்காது உயர்வில்லையே!”

‘வா ராஜா வா’ என்ற படத்தில் “தாயிற் சிறந்த கோவிலுமில்லை

தந்தை சொல் மிக்க மந்திரமில்லை”

இப்படியாக, திரைப்படத்தில் அன்னையைப் புகழ்ந்து எழுதப்பட்ட எத்தனையோ பாடல்களை நம்மால் அடையாளம் காட்ட முடியும்

இசைப்புயல் ஏ.ஆர்.ரகுமான் இசையில் ‘நியூ’ படத்தில் அண்மையில் வெளிவந்த

“காலையில் தினமும் கண் விழித்தால் நான்

கை தொழும் தேவதை அம்மா

அன்பென்றாலே அம்மா – என்

தாய் போல் ஆகிடுமா?”

என்ற பாடல் தாய்ப்பாசத்தை பறைசாற்றும் அருமையான பாடலென்பதை நம்மால் மறுக்க முடியாது.

கவி.காமு.ஷெரீப்பின் “அன்னையைப்போல் ஒரு தெய்வமில்லை” என்ற பாடலை செவியுறுகையில் நமக்குள் ஏதோ ஒரு இரசாயன மாற்றம் நிகழ்கிறது. நம்மை அறியாமலே நாம் மெய்மறந்து போகிறோம்.  இதற்கு நிகரான ஒரு பாடல் இதுவரை வரவேயில்லை என உறுதி கூறலாம்.

“தாயின் காலடியில் சொர்க்கம் இருக்கிறது” என்று அண்ணல் நபிகள் மொழிந்தார்கள். தாயின் மேன்மையை அத்தனை மதங்களும் அத்தனை இதிகாசங்களும் புகழ்பாடுகின்றன.

“ஈன்ற பொழுதின் பெரிதுவக்கும் தன்மகனைச்

சான்றோன் எனக்கேட்டதாய்”

என்றார் திருவள்ளுவர்.

“முந்தி தவமிருந்து, முன்னூறு நாள் சுமந்து, அந்தி பகலாக தொந்தி சரியக் கிடந்த” விந்தைமிகு அன்னையின் மேன்மையை கவியாகப் புனைந்தார் பட்டினத்தார்.

இதே கருத்தினை கவி.காமு,ஷெரீப் அவர்களின் காலத்தால் அழியாத  இப்பாடலின் தொகையறாவில் நாம் காண முடிகிறது.

பத்து மாதம் சுமந்திருந்து பெற்றாள்

பகல் இரவாய் விழித்திருந்து வளர்த்தாள்

வித்தகனாய் கல்வி பெற வைத்தாள்

மேதினியில் நாம் வாழ செய்தாள்

என்ற தொகையறாவைக் கேட்டதுமே  நம் உள்ளதில் தாய்ப்பாசம் பொங்கி நம்மை ஒருகணம் கண்கசிய வைத்து விடுகிறது.  நம் தாய் நமக்காக பட்ட இன்னல்கள் நம் கண்முன்னே வந்து நிழலாடுகின்றன. அவளை நினைத்து உருகிப் போகிறோம்.

 அன்னையைப் போல் ஒரு தெய்வமில்லைஅவள்

அடி தொழ மறப்பவர் மனிதரில்லை, மண்ணில் மனிதரில்லை

என்ற முதல் வரிகள் நம் மனதில் ஏது ஒரு மின்னலைப் பாய்ச்சுகின்றன. உணர்ச்சிப் பெருக்கெடுத்து ஒரு நிமிடம் நாம் மெளனித்துப் போகிறோம்.

தாயை மதிக்காத ஒருவனை மனித ஜாதியாகவே நாம் கருத முடியாது என்று சொல்லாமல் சொல்கிறார் கவிஞர்.

துன்பமும் தொல்லையும் ஏற்றுக்கொண்டேநம்மை

சுகம் பெற வைத்திடும் கருணை வெள்ளம்

என்ற வரிகள் தாயானவள் தன் குழந்தையை பெற்றெடுத்து, பேணி வளர்த்து ஆளாக்க எத்தனை விதமான துன்பங்களை எதிர்கொள்ள வேண்டியிருக்கிறது என்பதை நமக்கு விளக்குகிறது.

 நாளெல்லாம் பட்டினியாய் இருந்திடுவாள்ஒரு

நாழிகை நம் பசி பொறுக்க மாட்டாள்

மேலெல்லாம் இளைத்திடப் பாடுபட்டே

மேன்மையாய் நாம் வாழ செய்திடுவாள்

பாடல்கள் ஒரு சில வரிகளேயானாலும் அது ஒருவரின் மனதில் ஏற்படுத்தும் பாதிப்பை வருணிக்க இயலாது. ஒவ்வொரு சொற்களுக்குள்ளும் உணர்ச்சிகள் பொதிந்திருப்பதை உணர முடிகிறது.

“அன்னையின் ஆணை” என்ற படத்தில் கவி.கா.முஷெரீப் அவர்கள் எழுத, எஸ்.எம். சுப்பையா நாயுடு இசையமைப்பில்  டி.எம். சௌந்தரராஜன் பாடிய இப்பாடல் எத்தனை ஆண்டுகள் கடந்தாலும் அழியாத பாடலாக அன்றலர்ந்த மலராக மணம் வீசும்.

கவிஞர் அப்துல் கையூம்,

தலைவர், பாரதி தமிழ்ச் சங்கம்

பஹ்ரைன்

 

“பாட்டும் நானே பாவமும் நானே ” பாடல் சர்ச்சை

பாடும் நானே

புதுச்சேரியைச் சேர்ந்த ஷேக் முகம்மது அவர்கள் “ராஜ் மதன் “என்ற பெயரில் நடிக்கும் ஒரு திரைப்பட நடிகர் . ரஜனிகாந்துடன் திரைப்படக் கல்லூரியில் பயின்றவர் . ஒரு இந்தியக்கனவு என்ற படத்தில் நாயகனாக நடித்தவர் .கே.பாலச்சந்தரால் “தண்ணீர் தண்ணீர்” என்ற படத்தில் அறிமுகப்படுத்தப் பட்டவர் . இப்போது ‘வம்சம்’ போன்ற ஏராளமான சின்னத்திரை தொடர்களில் நடித்துக்கொண்டிருகிறார் . ‘யாரடி நீ மோகினி ‘என்ற படத்தில் நயனின் தந்தையாக நடித்திருப்பார் .இப்போது அடையாளம் தெரிந்திருக்குமே ! (இந்தப்படத்தின் பெரும்பாலான காட்சிகள் நெல்லை பாளையங்கோட்டையை அடுத்துள்ள ரெட்டியார்பட்டியில்தான் எடுக்கப்பட்டது)
சரி ! இப்போது விஷயத்திற்கு வருகிறேன் . நாங்கள் சந்திக்கும்போதெல்லாம் பலவிஷயங்களைப் பற்றி பேசிக்கொண்டு இருப்போம். இந்த முறை அவர் வந்திருந்தபோது கவிஞர் .கா.மு .ஷெரிப் அவர்களைப் பற்றி பேச்சு வந்தது . ‘திருவிளையாடல்’ என்ற படத்தில் வரும் பாடல்கள் அனைத்தும் கவிஞர். கண்ணதாசன் எழுதியது என்று விளம்பரப்படுத்தியிருப்பார்கள். ஆனால் ‘பாட்டும் நானே பாவமும் நானே’ என்ற பாடலை மட்டும் எழுதியது கவிஞர். கா.மு. ஷெரிப் என்றேன் . அப்போது ஷேக் அவர்கள் இது உண்மையான தகவல்தான் . இது எப்படி நடந்தது எப்படி என்பதை நான் சொல்கிறேன் என்று சொல்லி அந்த விபரத்தை விரிவாகச்சொன்னார் .

அவர் சொன்ன அந்த அரிய தகவல் நண்பர்களை  சென்றடையவேண்டும் என்ற ஆவலுடன் அவர்சொன்ன விபரங்களை நான் உங்களுடன் பகிர்ந்துகொள்கிறேன் .

1956 ம் ஆண்டு ‘சம்பூர்ணராமாயணம்’ என்ற படம் எம்.ஏவி. பிக்சர்ஸ் எம்.ஏ .வேணு என்பவரால் தயாரிக்கப்பட்டது . இயக்குனர் ஏ .பி நாகராஜன். ராமயணத்தில் ராவணன் ஒரு இசை மேதை . சபையோருக்கு ராவணனின் இசைத்திறமையை வெளிப்படுத்தும் விதமாக அரசவையில் ராவணன் பாடும் பாடல் ஒன்று தேவைப்பட்டதாம் . அரசவையில் ராவணன் பாடும் அந்த ஒரு காட்சியிலேயே ராவணின் இசைப் புலமையை வெளிப்படுத்தும் விதமாக பாடல் சிறப்பாக அமைய வேண்டும் என்பதற்காக இரு கவிஞர்களிடம் பாடல் எழுதும் பொறுப்பு தரப்பட்டதாம்.

அந்தக் கட்சிக்கு கவிஞர் மருதகாசி ‘சங்கீத சௌபாக்கியமே ! என்றும் குன்றாத பெரும்பாக்கியமே ! “ என்ற பாடலை எழுதினார் . அந்தப் பாடலில் வெவ்வேறு சந்தர்ப்பங்களில் பாடும் ராகங்களை சி.எஸ் ஜெயராமன்பாடுவார் இன்றும் மக்கள் மனதில் நீங்காமல் ஒலித்துக்கொண்டிருக்கும் பாடல் அது .

ராவணன் பாடும் அந்த பாடல் காட்சிக்காக கவிஞர் .கா.மு .ஷெரிப்அவர்கள் ‘பாட்டும் நானே ! பாவமும் நானே ! என்ற பாடலை எழுதி டி .எம். சௌந்தரராஜன் பாட அந்த இரண்டு பாடல்களுமே கே.வி .மகாதேவனால் இசை அமைக்கப்பட்டு ஒலிப்பதிவுசெய்யப் பட்டதாம் . ஆனால் திரைப்படத்தில் மருதகாசி அவர்கள் எழுதிய “சங்கீத சௌபாக்கியமே!” என்ற பாடல்தான் இடம்பெற்று சக்கை போடு போட்டது .

பத்தாண்டுகள் கழித்து ‘திருவிளையாடல்’ படம் தயாரிக்கப்பட்டபோது ஹேமநாத பாகவதர் வேடத்தில் வரும் சிவனின் இசைப் புலமையை வெளிப்படுத்தும் காட்சிக்காக பாடல் ஒன்று தேவைப்பட்டதாம் . அப்போது ஏ.பி. நாகராஜனின் நண்பர் ஒருவர் பத்தாண்டுகளுக்கு முன்பு சம்பூர்ண ராமாயணம் படத்திற்காக கா .மு. ஷெரிப் எழுதி பதிவுசெய்யப்பட்ட பாடலை திருவிளையாடல் படத்திற்கு பயன்படுத்திக்கொள்ளலாமே என்ற யோசனையை இயக்குனர் ஏ .பி .நாகராஜனிடம் கூற உடனே அவர் அந்த யோசனையை ஏற்றுக்கொண்டாராம் .

உடனே கா.மு ஷெரிப் அவர்களை தொடர்புகொண்டு அவரது சம்மதத்தைக் கேட்டார்களாம் . எந்த மறுப்பும் சொல்லாமல் பெருந்தன்மையுடன் சம்மதம் கொடுத்தாராம் கவிஞர் . மிகவும் மகிழ்ந்த ஏ.பி. நாகராஜன் அந்த பாடலுக்கு என்ன சன்மானம் வேண்டுமென்று கேட்டனுப்பினாராம். அதற்கு கா.மு.ஷெரீப் அவர்கள் அந்தப் பாடலுக்கு நான் ஏற்கனவே பணம் வாங்கிவிட்டேன் . இப்போது அதே பாடலுக்கு மீண்டும் பணம் வாங்கமாட்டேன் என்று மறுத்து விட்டாராம் . எவ்வளவு உயந்த பண்பாளர் கா.மு ஷெரிப் அவர்கள் !

மீண்டும் அதே ‘பாட்டும் நானே’ என்ற பாடல் டி.எம் சௌந்தரராஜனால் பாடி ஒலிப்பதிவு செய்யப்பட்டு ‘திருவிளையாடல் ‘படத்தில் இடம்பெற்றது .

கவி .கா .மு ஷெரீப் அவர்களைப் பற்றிய சில தகவல்கள் . 1948 ம் ஆண்டு ‘மாயாவதி’ என்ற படத்தில் முதன்முதலாக பாடல் எழுதிய கா.மு .ஷெரிப் அவர்கள் சுமார் நூறு படங்களுக்குமேல் பாடல்கள் எழுதியிருக்கிறார் . காலத்தால் அழியாத பாடல்கள் அவை .

அவற்றில் சில : ‘டவுன் பஸ்’ என்ற படத்தில் வரும் “ சிட்டுக்குருவி சிட்டுக்குருவி சேதி தெரியுமா ! மற்றும் பொன்னான வாழ்வு மண்ணாகிப்போனால்” , முதலாளி படத்தில் வரும் ‘ஏரிக்கரை கரையின் மேலே ‘ அன்னையின் ஆணை படத்தில் வரும் ‘ அன்னையைப் போல் ஒரு தெய்வமில்லை ‘ , சிவகாமி படத்தில் வரும் ‘வானில்முழுமதியைக்கண்டேன் ‘ மந்திரிகுமாரி படத்தில் வரும் ‘உலவும் தென்றல் காற்றினிலே ‘ நான் பெற்ற செல்வம் படத்தில் வரும் ‘ வாழ்ந்தாலும் ஏசும் தாழ்ந்தாலும் ஏசும் ‘ மக்களை பெற்ற மகராசி படத்தில் வரும் ‘ ஒன்று சேர்ந்த அன்பு மாறுமா ? ‘ போன்ற ஏராளமான பாடல்கள் கவிஞரின் சாகாவரம் பெற்ற பாடல்கள் .

(கவிஞர் .கா.மு .ஷெரீப் அவர்கள் கலைஞர் .கருணாநிதிக்கு உயிர் நண்பர் என்பது கூடுதல் தகவல்.)

 தகவல் : முஹம்மது முஸ்தபா

 

சென்னையில் நூற்றாண்டு விழா

KM 4

‘சிட்டுக்குருவி சிட்டுக்குருவி செய்தி தெரியுமா, வாழ்ந்தாலும் ஏசும் தாழ்ந்தாலும் ஏசும் வையகம் இதுதானடா, உலவும் தென்றல் காற்றினிலே, ஏரிக்கரை மேலே போறவளே பெண் மயிலே.. போன்ற, காலத்தால் அழியாத புகழ் பெற்ற பாடல்களை எழுதியவர் கவி.கா.மு.ஷெரீப்.

ம.பொ.சி.யின் தமிழரசுக் கழகத்தின் பொதுச் செயலாளராக இருந்து, தெற்கெல்லைப் போராட்டம், திருத்தணி மீட்புப் போராட்டத்தில் தளபதியாக விளங்கியவர். திமுக தலைவர் கலைஞரின் திரையுலக நுழைவுக்கு காரணமாக இருந்தவர்.

கா.மு.ஷெரீப்பின் நூற்றாண்டையொட்டி, (26-12-2014) வெள்ளி மாலை, சென்னை ராணி சீதை மன்றத்தில் நூற்றாண்டு விழா நடைபெற்றது.

கவிக்கோ அப்துல் ரகுமான், கவிப்பேரரசு வைரமுத்து, தமிழச்சி தங்கபாண்டியன், காவ்யா சண்முக சுந்தரம், வீரபாண்டியன், எம்.ஏ.முஸ்தபா, ஆளூர் ஷாநவாஸ் ஆகியோர் உரையாற்றினர்.

விழாவில், கா.மு.ஷெரீப் எழுதிய நூல்கள், நூற்றாண்டு மலர், கா.மு.ஷெரீப் திரை இசை முத்துக்கள் ஆடியோ குறுந்தகடு ஆகியன வெளியிடப்பட்டன.

பி.எச்.அப்துல் ஹமீத் தொகுப்புரையில், பழம்பெரும் பாடகி எம்.எஸ்.ராஜேஸ்வரி, முகேஷ், குமரி அபூபக்கர் ஆகியோரின் இசைநிகழ்ச்சியும் நடைபெற்றது. விழா ஏற்பாடுகளை முஸ்தபா தமிழ் அறக்கட்டளையினர் செய்திருந்தனர்.

நன்றி : நக்கீரன்